ఆకలి సెగలు.. అందని బకాయిలు
*నెల్లిమర్ల జ్యూట్ మిల్లు కార్మికుల 'కన్నీటి' గాథ!
నెల్లిమర్ల, దివ్య దర్శని న్యూస్:
దశాబ్దాల కాలం పాటు
ఆ మిల్లు యంత్రాల హోరులో తమ రక్తాన్ని చెమటగా మార్చి, సంస్థ ఎదుగుదలకు తోడ్పడ్డారు ఆ కార్మికులు. కానీ, విశ్రాంతి తీసుకోవాల్సిన వృద్ధాప్యంలో నేడు వారు 'ఆకలి'తో పోరాడుతున్నారు. తమ సొంత సొమ్ము కోసం, తాము కష్టపడి దాచుకున్న హక్కుల కోసం నెల్లిమర్ల జ్యూట్ మిల్లు కార్మికులు రోడ్డున పడ్డ పరిస్థితి అత్యంత దారుణం.
బౌన్స్ అయిన చెక్కులు.. ముక్కలైన ఆశలు..
రిటైర్ అయిన తర్వాత ఆ వచ్చే కొద్దిపాటి గ్యాట్యూటీ డబ్బులతో ఆడపిల్లల పెళ్లిళ్లు చేయాలని, అనారోగ్యానికి వైద్యం చేయించుకోవాలని కలలు గన్న కార్మికులకు యాజమాన్యం కోలుకోలేని దెబ్బ తీసింది. యాజమాన్యం ఇచ్చిన దాదాపు రూ. కోటి విలువైన గ్యాట్యూటీ చెక్కులు బౌన్స్ అవ్వడం వారి పట్ల యాజమాన్యానికి ఉన్న నిర్లక్ష్యానికి పరాకాష్ట. చెక్కులు చేతిలో ఉన్నా, ఖాతాలో సొమ్ము జమకాక కార్మికులు పడుతున్న అవస్థలు వర్ణనాతీతం.
పెన్షన్ లేదు.. వైద్యం అందదు
కార్మికుల వేతనాల నుంచి రికవరీ చేసిన పీఎఫ్, ఈఎస్ఐ సొమ్మును ప్రభుత్వం వద్ద సకాలంలో జమ చేయకపోవడంతో కార్మికులు రెట్టింపు నష్టాన్ని చవిచూస్తున్నారు.
పిఎఫ్ వాటా చెల్లించకపోవడంతో రిటైర్డ్ కార్మికులకు రావాల్సిన నెలవారీ పింఛను నిలిచిపోయింది. ఆరోగ్య సమస్యలతో బాధపడుతున్నా, ఈఎస్ఐ సేవలు అందక కార్మికులు ప్రైవేట్ ఆసుపత్రులకు వెళ్లలేక, మందులు కొనలేక ప్రాణాలు విడుస్తున్నారు.
చనిపోతున్నా చలించని యాజమాన్యం!
దురదృష్టవశాత్తూ, గ్యాట్యూటీ బకాయిలు అందకముందే కొంతమంది కార్మికులు అనారోగ్యం, మానసిక ఆందోళనతో కన్నుమూస్తున్నారు. చనిపోయిన కార్మికుల నామినీలకు కూడా చెక్కులు అందజేయడంలో యాజమాన్యం జాప్యం చేయడం అత్యంత అమానవీయం. 2016 నుంచి నేటి వరకు సుమారు 1200 మందికి పైగా కార్మికులు తమ హక్కుల కోసం ఎదురుచూస్తూనే ఉన్నారు.
ప్రజాప్రతినిధుల గళం.. అధికారుల మౌనం
నెల్లిమర్ల ఎమ్మెల్యే లోకం నాగమాధవి అసెంబ్లీ వేదికగా ఈ సమస్యను లేవనెత్తినా, కార్మిక సంఘాలు నిత్యం పోరాటాలు చేస్తున్నా పరిస్థితిలో మార్పు రాకపోవడం గమనార్హం. కార్మిక శాఖ అధికారులు మొక్కుబడిగా సమావేశాలు ఏర్పాటు చేస్తున్నారే తప్ప, యాజమాన్యంపై కఠిన చర్యలు తీసుకోవడంలో విఫలమవుతున్నారనే విమర్శలు వెల్లువెత్తుతున్నాయి.
తక్షణ పరిష్కారం కావాల్సిన ప్రధాన డిమాండ్లు
1 రుణ బకాయిల చెల్లింపు 5 వేల మంది కార్మికుల వద్ద తీసుకున్న అప్పును (ఒక్కొక్కరికి రూ. 52,000 చొప్పున) వెంటనే చెల్లించాలి.
2 కొత్త చెక్కుల జారీ బౌన్స్ అయిన రూ. కోటి విలువైన చెక్కుల స్థానంలో కొత్త చెక్కులు ఇవ్వాలి.
3 వారసులకు న్యాయం: మరణించిన కార్మికుల నామినీల పేరిట వెంటనే చెక్కులు మంజూరు చేయాలి.
4 పిఎఫ్,ఈఎస్ఐ బకాయిలు పెండింగ్లో ఉన్న ప్రభుత్వ వాటాలను చెల్లించి, పెన్షన్, వైద్య సేవలు పునరుద్ధరించాలి. 5. గ్యాట్యూటీ క్లియరెన్స్ 2016 నుండి పెండింగ్లో ఉన్న 1200 మంది కార్మికుల గ్యాట్యూటీ చెక్కులు అందించాలి
కార్మికుల శ్రమతో కోట్లు గడించిన యాజమాన్యం, నేడు వారిని నడిరోడ్డుపై వదిలేయడం సామాజిక నేరం. ఇప్పటికైనా ప్రభుత్వం, కార్మిక శాఖ జోక్యం చేసుకుని, మొండికేస్తున్న యాజమాన్యంపై కఠిన చర్యలు తీసుకోవాలి. "ఆకలి మంటలతో అలమటిస్తున్న నెల్లిమర్ల కార్మికులకు న్యాయం చేయాలి.
