“ తవ్వి వదిలేసిన రహదారి… ప్రమాదాలకు ఆహ్వానం”
పాడేరు ప్రభుత్వ ఆసుపత్రి పనుల్లో నిర్లక్ష్యం – మూడు రోజులుగా మరమ్మత్తులు లేవని ప్రజల ఆగ్రహం
దివ్య దర్శిని న్యూస్,పాడేరు, ఏప్రిల్ 21:
ప్రజా సౌకర్యాల పేరిట చేపట్టిన పనులు ప్రజలకే ఇబ్బందిగా మారిన ఘటన అల్లూరి సీతారామ రాజు జిల్లా పాడేరు పట్టణంలో వెలుగులోకి వచ్చింది. ప్రభుత్వ ఆసుపత్రికి వాటర్ పైప్లైన్ ఏర్పాటు చేసే క్రమంలో సాయిబాబా గుడి సమీపంలో, వెలుగు కార్యాలయం ఎదురుగా రహదారిని అనియంత్రితంగా తవ్వి, మూడు రోజులుగా అలాగే వదిలేయడం తీవ్ర విమర్శలకు దారితీసింది.
స్థానికుల వివరాల ప్రకారం, సాంకేతికంగా డ్రిల్లింగ్ యంత్రంతో పరిమితంగా కట్ చేయాల్సిన రహదారిని భారీ జేసీబీ యంత్రంతో సుమారు రెండు అడుగుల వెడల్పు వరకు తవ్వడం జరిగింది. ఫలితంగా రహదారి పూర్తిగా దెబ్బతిని వాహనదారులు, పాదచారులు తీవ్ర ఇబ్బందులు ఎదుర్కొంటున్నారు. ముఖ్యంగా రాత్రివేళల్లో ఈ ప్రాంతం ప్రమాదకరంగా మారి, ప్రమాదాలకు దారి తీసే అవకాశం ఉందని ప్రజలు ఆందోళన వ్యక్తం చేస్తున్నారు.
అత్యంత ఆందోళనకర విషయం ఏమిటంటే, పనులు పూర్తయ్యాక తవ్విన ప్రదేశాన్ని తక్షణమే పూడ్చి, తారు వేసి రహదారిని పునరుద్ధరించాల్సిన బాధ్యత సంబంధిత అధికారులదే అయినప్పటికీ, ఇప్పటివరకు ఎలాంటి చర్యలు తీసుకోకపోవడం. ప్రజల సురక్షతను పక్కనపెట్టి వ్యవహరిస్తున్న అధికారుల వైఖరిపై స్థానికులు తీవ్ర అసంతృప్తి వ్యక్తం చేస్తున్నారు.
ఈ నేపథ్యంలో, రహదారిని తక్షణమే మరమ్మత్తు చేయాలని, రోడ్డు & భవనాల శాఖ (R&B)తో సమన్వయం చేసి తారు వేసే పనులు చేపట్టాలని ప్రజలు డిమాండ్ చేస్తున్నారు. అంతేకాకుండా, ఇలాంటి పనులు చేపట్టేటప్పుడు ప్రామాణిక నిబంధనలు పాటిస్తూ ప్రజలకు ఇబ్బందులు కలగకుండా చర్యలు తీసుకోవాలని సూచిస్తున్నారు.
ప్రజా సమస్యపై స్పందించాలని ప్రింట్, ఎలక్ట్రానిక్ మీడియాకు విజ్ఞప్తి చేస్తూ, బాధ్యులపై చర్యలు తీసుకోవాలని స్థానికులు కోరుతున్నారు.
